MISMATCHED

Shaam ke chaar baje jab Ansh apne class se bahar nikla toh usne door se dekha ki kisine toh almost usike jaisa matching dress pehena hai, bas fark sirf itna tha ki bas wo uska ulta tha. Yeh aaj kal ka trend hai na ki do dost same same kapde pehnenge aur usko social media pe #twinning ke naam pe trend chalate hain. Par wo toh kuch alag tha use same nahi keh sakte….
Ansh ne white t-shirt aur black pant pehni hui thi jabki uss ladki ne black kurti aur white pant pehni hui thi. Ise kya kahein?? Kya pata? Ansh us baat ko bhul kar apne hostel ki or badhne laga jab usne ek halki si awaz suni. Awaz jaani pehchani si thi, dev ki awaz thi wo.
Abe idhar kya kar raha hai, room nahi jaana kya chal jaldi
Un dino garmi ke mahino mein kadakti dhoop aise gir rahi thi maano aag ugal rahi ho. Room mein aake fresh hone ke baad ansh sochne laga ki wo kya hai. Guzre hue 2 hafto se wo dekh raha hai wo same ladki uske saath humesha opposite kapde kaise pehenti thi. Kabhi kabhi ho toh use ittefaq ka naam diya jaa sakta tha par itne dino se kaise kyun. Sawal pe sawal uske zehen mein utar hi rahe the ki uske dost ne use bulake uska dhyaan bhatka diya.
“chal bhai khaana nahi hai kya?”
“haan chal” kehte hue ansh nikal toh gaya tha par wo nahi nikli thi uske dimaag se. nahi nikla tha uska roz uske jaise kapde pehen na par ulte tarah se. Ansh ne turant hi Google kiya ki ye twinning ka opposite kya hai toh uske aage ek shabd aake ruk sa gaya.
“MISMATCHED”
Pata nahi kyun par uske jaise to nahi par use mismatched kapde pehenna achha lagta tha ansh ko.
Par usne kabhi uska chehra nahi dekha tha, maloom hi nahi tha ki wo ladki hai kaun, kahaan se aayi hai , kaha padhti hai, kaunsa branch, kaunsa year.
Kuch bhi pata nahi tha use. Par phir bhi use aise mismatched kapdo mein dekhna usko achha lagne laga tha. Dopeher ke 2.30 baje honge us din, jab ansh apne class se nikal ke cafeteria aaya hua tha.hindi
“Bhai kya hi garmi hai yaar, main toh pura paseena paseena ho gaya bhai….
“haaan bhai khoon toh lava jaisa garam ho gaya mera” dev sir pe haath  rakhte hue bola.
Ansh khane ke baad wash basin ki or badhne hi wala tha ki tabhi waha se ek blue jeans aur denim shirt mein ek ladki bahar aayi, uske bag ko dekhke pata chal chuka tha ansh ko ki wo wahi hai jisse bhaisahab 15 dinon se mismatching kar rahe hain. Aur is time jab usne khudko dekha toh pata lag chuka tha ki usne kya pehna hai, denim jeans aur blue t shirt. Par is baar kuch aur hua tha uske saath , dono ki nazrein saamne rakhe seeshe ki madad se takrayin thi. Gora rang, kaali aankhein, ghumraale baal aur gulabi honth mein thi wo ladki. Aaj pehli baar dekha tha usne par jaane kyun wo shakal use aise lagne laga ki uss chhere ko dekhta aa raha hai, jaise maano ki wo koi anjaan nahi thi uske liye, jaise ki ansh jaanta ho, pehchaanta ho use. Peeche hokar ansh bas kucch der use jaate hue nihaar ne laga, aur man hi man muskurane laga tha……..
Shaam ko cafeteria band hone se pehle kuch log khali pade hue chairs pe aram karke AC ka mazaa utha rahe the jab pehli baar ansh ko pata chala ki us mismatched ladki ka naam kya hai jab uski dost ne use bulaya aur kaha
“SARAAAAA……… yaha pe ajaa , bohut khali hai ”
Pehli baar uska naam apni zubaan se lene ke baad ansh ko mehsoos hone laga ek apna pan, bina mile, bina baat kiye aur bina ek dusre ko pehchaane itna achha koi kaise lag sakta hai. Aise hi sochte sochte Puri raat  nikal gayi…
Agli subah asmaan ko baadal ne dhak rakha tha, baarish ka Mausam toh nahi tha par aate hue toofan ki wajah se ye haal tha. Ansh ki bhook ke maare halat patli ho chuki thi jiski wajah se wo canteen jaane ke liye tadap raha par baarish ka kya hi kar pata wo..
Takreeban aadhe ghante ke baad jab baarish ne apna mod kisi aur disha ko moda toh ansh ki jaan mein jaan aayi
Black trousers aur white tshirt mein nikal pada canteen ki or. Hostel ke gate se bahar nikalte hi usne dekha ki baarish se bheegke jaha bohot log apne apne jagahon ko jaa rahe they, koi ek tha jo bheegi tehniyon ko hilakar thodi aur bheegne ki chahat mein tha. Jab usne ansh ko dekha toh ansh ne muh pher liya tha usse par jaa nahi paya tha usse door…. Kuch do hi kadam chala hoga wo jab kisine usse peeche se bulaya
“Suno… Hello…umm…”
“Ansh…”
Badhte kadam ruk gaye the jab apne naam ko suna usne. Mudke dekha toh wahi pehchana sa chehra tha, Sara ka chehra tha.
“Haan” ansh ne hichkichate hue bola
“Tum wahi ho na Jo Roz mere saath twin karte ho?”
“A…a…umm….ha…aaa..n”
“Tumhe Mera naam kaise pata chala?” Ansh ne iss baar uski aankhon mein dekhkar kaha..
Uski bheegi aankhon mein ek jawab ki talash mein ansh khona chahta tha, Jaan na chahta tha ki kya usne bhi wahi notice Kiya hai jise ansh ne kiya tha?
“Uss din tum jab class se bahar aa rahe the toh main tumhare peeche hi aa rahi thi..” bheegi hui zulfon ko apne kaan ke peeche karte hue usne kaha “tab main tumhare peeche hi thi..” aur usne muskuraya
“Achha ” kehkar Apne dhadakte dil ko sambhalne ki koshish karne laga..
“By the way my name is…”
“Saraa… Pata hai…” Ansh ne usse rokte hue kaha
Sharmate hue sara ne apni nazrein jhuka li aur kaha
“Canteen chaloge??”
Ansh muskurate hue bola “chalunga par tum aise bheegi hui aaogi?”
Dono ne ek dusre ko dekhakar muskuraya aur chal pade uske room ki or. Dus minute baad jab wo baahar aayi aur ansh ne use dekha toh usne ek black tshirt aur white shorts pehna tha…. Aur dono ne jab ek dusre ko dekha toh muskuraane lage kyunki dono ko pata tha ki wo kapde ek dusre se MISMATCHED they…….

Do you have a story? Click here to submit it / Connect with the admin