Naa jaane kyun phir m💖habbat karne laga Part IV- Rohan urf Sikander

Aakhri baar use dekha tha to voh laal rang mein thi. Bahut khoobsurat lag rahi thi.
Aaj use dekh raha hoon toh vo safed rang mein, bahut khoobsurat lag rahi hai.

Aakhri baar use dekha tha toh vo mehfil mein thi, bahut khoobsurat lag rahi thi.
Aaj use dekh raha hoon toh vo ab bhi logon se ghiri hui hai, bahut khoobsurat lag rahi hai.

Aakhri baar use dekha tha to vo ghar se vidai le rahi thi, bahut khoobsurat lag rahi thi.
Aaj use dekh raha hoon toh vo phir vidaai le rahi hai, bahut khoobsurat lag rahi hai.

Aakhri baar use dekha tha to log use ghere aansoo baha rahe the, aur vo bahut khoobsurat lag rahi thi.
Aaj bhi log use ghere zaar zaar ro rahe hain, aur vo ek baar phir bahut khoobsurat lag rahi hai.

Par nahi, kuchh farq bhi toh hai.

Jab isse pehle use dekha tha toh vo gehno se ladi hui thi, sar se paon tak sone ki gudiya lag rahi thi. Aur aaj toh use bepanah husn ki shaan badhane ko kuchh bhi nahi. Pehle har chehre chehre par raunak thi, mehfil thi aur aaj toh sirf matam hai, veerani hai. Log tab bhi the, log aaj bhi hain par in sabke beech vo aaj hote hue bhi nahi hai.

Tab jiske gale mein phool the, aaj uski tasveer par phool hain.

Dar-e-yaar par badi dhoom hai,
vahi aashiqon ka hujoom hai,
Abhi neend aayi hai husn ko,
koi shor karke jaga na de.

Par aisa lagta hai ke maut sirf itna hi kar saki ke jism se rooh ko nikal le gayi. Isse zyada shayad maut ke bas mein bhi nahi tha. Vo aaj safed chadar mein lipti jin logon ke beech hai, unmein se har kisi ke chehre par gham hai par jiske liye zamana ghamzada hai vo khud kitni pur-sukoon hai. Vahi raunak jisne zindagi bhar saath diya vo aaj aakhri lamho mein bhi chehre ka saath chhod na saki.

Aur un sab logon ke beech betha main abhaga ye tay hi nahi kar pa raha hoon ke meri duniya aur kitni baar lutegi. Kabhi laal rang mein toh kabhi safed rang mein waqt aur kitni baar mere saath mazak karega. Main jiska haath thaam kar sapne sajana chahta tha, aak vo khud ek khwab bankar maut ka haath thaame jaane kahan chali gayi.

Main khada sochta hi reh gaya aur meri mehfil veeran ho gayi.

Aur phir dil mein khyaal aata hai ke auron ki tarah main bhi zaar zaar ro doon. Beh jaane doon ye dariya jo kabse aankhon mein samete hue hoon. Peet loon main bhi apni chhati, phod loon main bhi apna sar. Ke main bhi aasmaan ki taraf chehra uthaoon aur ek patthar utha kar khuda ki tarah phenkne ki koshish karun. Aur usse shikayat karun, gila karun.

Khyaal aata hai ke jo kabhi masoomiyat ki tarah baar baar chhoti bachchi ki tarah mujhse lipat jaati thi, aaj main uske murda jism se lipat jaoon. Jo baat zindagi bhar usse na keh saka, aaj use apni zubaan tak le aaon. Bethun uske sirahne, rakh loon uska bejaan sar apni god mein, thaam loon uske thande pad chuke haath aur bataoon use ke kaise main apni zindagi ka har pal uske naam kar chuka hoon. Kaise uske dam se meri zinadgi ka dam tha. Ke kaise main usse door hokar bhi hamesha aur sirf usi ka raha.

Peet loon main bhi apni chhati, phod loon main bhi apna sar. Pehenke kala choga, main bhi dhar loon roop Rudaali ka.

Ban jaoon main bhi aaj deewana aur majnu aur ranjha ki tarah main bhi uski mayyat par zamane ko dikha doon ke main usse kis qadar mohabbat karta tha. Jo baat kabhi usse na keh saka, aaj poori duniya se keh doon. Ke rok loon use jaane se. Wasta doon apni dosti ka, shart rakhun apni mohabbat ki aur kahun kuchh aisi baat ke vo palat aaye. Saanson ki rawani, dhadkan ka silsila, jism ki garmi phir laut aaye aur vo yun hi ithlati hui mujhse lipat jaaye.

Maangun koi aisi dua ke mera khuda mujhe meri mohabbat phir lauta de.

Ya phir chalun main bhi uske saath thi. Chahta bhi toh yahi tha ke uske saathi hi rahun, hamesha. Toh kyun na aisa karun ke aaj main bhi uske saath is anjaan safar par nikal padun. Jo kabhi ghar se bahar tak mere bina nahi nikalti thi, aaj use ek anjaan duniya mein akele kaise jaane doon?

Par nahi, main toh bas khamosh betha hoon, jaise hamesha se uske saamne khamosh raha. Aaj bhi bas soch raha hoon ke ye karun, vo kahun par bas ek kone mein betha khamoshi se uske chehre par nazar jamaye hoon. Aaj bhi bas sabki nazar bacha kar, uski nazar bacha kar, uske husn ka deedar kar raha hoon. Aaj bhi soch raha hoon ke kya kahun, kaise kahun.

This is your admin Sunil Gupta, Please follow me on Instagram and Whatsapp: 7065637638 (Ye kisi Ladki ka number nahi hai 😀 :P) for questions and complaints.

Comments

comments

1 Comment

  1. Prince

    Great Love Story.

    Hey there! It’s me, Prince here. I feel myself so lonely because, I don’t have any friends. If Any Boy or Girl, Who needs A Good & Faithful Friend and Would like to Friendship with me? So, Please WhatsApp/Message me on 9199007192. Only Serious Persons are allowed, Arrogant People & Time-Passers Stay Away.

    Reply

Leave a Comment

Your email address will not be published. Required fields are marked *